Angovo azo havaozina
Vita sonia ny fifanarahana miaraka amin’i Indonezia
Ho fampiroboroboana ny sehatry ny angovo azo havaozina eto Madagasikara, dia himasoana ny fiaraha-miasa amin’ny any ivelany. Tontosa tany Bali Indonezia, ny 3 Septambra ny fanaovan-tsonia, ny fifanaraham-piaraha-miasa eo amin’i Madagasikara sy Indonezia. Ny fananganana tobim-pamokarana herinaratra avy amin’ny riandrano no himasoana .
Nisolo tena an’i Madagasikara nandritra ny fanaovan-tsonia ny Delagasiona avy eto anivon’ny Ministeran’ny Angovo sy Akoranafo. Nandritra izany dia nisy ny fifanolorana ireo atontan-taratasy fifanarahanana na ny « Memorandum Of Understanding » (MoU) teo amin’ny Firenena roa tonta ka ireto manaraka ireto no teboka hifantohan’ny fiaraha-miasa :
Fanajariana foto-drafitrasa mamokatra herinaratra miainga avy amin’ny toha-drano, Ny taona 2025 no hanatanterahana ny fandinihina sy ny fikarohana rehetra (études de faisabilité), Hametraka ireo fitaovam-pandrefesana ny rotsak’orana, sy ny habetsahan’ny rano ihany koa ny Governemanta Indonezianina, ka ny taona 2026 no hanombohana ny fananganana ny fotodrafitrasa, Hisy ny fifampizaràna traikefa sy fiofanana eo amin’ny teknolojia, ny sehatry ny lalàna sy ny fenitra misy eo amin’ny Firenena roa tonta.
Marihina moa fa manomboka avy hatrany ny fiaraha-miasa, taorian’ny fanaovan-tsonia. Izany rehetra izany dia tohin’ny tan-tsoroka sy fiaraha-miasa amin’ny alalan’ny SSTC (Coopération Triangulaire Sud Sud) izay iarahana amin’ny « Coopération Allemande ».