Tonga ao Manakara ny « Branchement Mora »

« Jiro Mora, malaky ». Tokantrano miisa 1.500 no tanjona, hisitraka herinaratra amin’ny alalan’ny tetikasa « Branchement Mora » ao Manakara. Natomboka androany 25 Jolay 2023 ny fampidiran-jiro ho an’ireo mpanjifa vaovao. Araka ny fanazavan’ny Talem-paritry ny Angovo sy Akoran’afo (DIEH) Fianarantsoa, dia 700 izao no isan’ireo efa nisoratra anarana. 400 no efa nahavitana tombana amin’ny saran’ny fampidirana ny jiro (devis), ary 110 amin’ireo no efa nahaloa ny sarany ka hisitraka jiro tsy ho ela.

Nitarika izao fanombohana ofisialy izao, ny Governoran’ny Faritra Fitovinany, sy ny « Préfet » notronin’ny solontenan’ny Ministeran’ny Angovo sy Akoran’afo nahitana an-dRtoa Talen’ny Fampiroboroboana ny Fampidirana Herinaratra amin’ny Tontolo Ambanivohitra (DAER) sy Atoa DIEH Fianarantsoa ary ireo tompon’andraikitra eo anivon’ny Orinasa JIRAMA. Hetsika tafiditra indrindra ao anaty fanatanterahana ny Velirano faha-2 an’Atoa Filoham-pirenena Malagasy : « angovo ho an’ny daholobe ».