Tetikasa Volobe
Tafatsangana ny birao hiasana
Marika lehibe, firosoana amin’ny fanatanterahana ny Tetikasa fananganana tobim-pamokarana herinaratra avy amin’ny toha-drano ao Volobe no vita.
Tontosa ny 15 Novambra 2024 teto Ambodimanga, Kaominina ambanivohitra Ambodilazana ny fitokanana ny birao hiasan’ireo mpiasa eo anivon’ny orinasa « Compagnie Générale d’Hydroélectricité de Volobe » (CGHV). Raha Tsiahivina dia tamin’ny 8 Aogositra 2024 no nametrahana ny vatofototra. Tao anatin’ny 3 volana monja no nananganana ity fotodrafitrasa mirefy 800m2 ity. Toerana ahafahana ihany koa, mandray eny ifotony ireo mpiara-miombon’antoka, sy handraisana fifanakalozana ary fanamafisana ny fahaiza-manao.
Tarigetra ny hampiaina araka ny tokony ho izy, ireo mpiasa eo am-panatanterahana ny andraikiny sy hifandray mivantana amin’ny vahoaka manodidina.
Izao dia porofo amin’ny fahavononana hiroso amin’ny fanatanterahana ny Tetikasa fananganana Tobim-pamokarana herinaratra avy amin’ny toha-drano, Volobe, izay hanana tanjaka 120MW ka hamokatra 750GWh isan-taona. Tanjona ny hanampy tosika ny famokarana herinaratra amin’ny Tambazotra Iraisan’ny Toamasina (RIT) sy ny Tambazotra Iraisan’Antananarivo (RIA).
Nitarika ny lanonam-pitokanana ny Sekretera Jeneralin’ny Ministeran’ny Angovo sy ny Akoranafo, Atoa Ny Solofo ANDRIANTSOA. Nanotrona sy nanome voninahitra, ireo olom-boafidy isan-tsokajiny sy ireo tompon’andraiki-panjakana isan-tokony, ny delegasiona avy amin’ny CGHV, notarihin’ny Tale Jeneraliny, Atoa Rémy HUBER ary ireo vahoaka eny an-toerana.
Taorian’ny fitokanana, dia nisy ny fitsidihana ny toha-drano sy ny toerana hananganana ny tobim-pamokarana herinaratra, Volobe II.