Notanterahina teny amin’ny Lapam-panjakana Iavoloha ny Alarobia 8 Janoary 2025 ny Filan-kevitry ny Minisitra, notarihin’Atoa Filohan’ny Repoblika Andry RAJOELINA, ary natrehin’Atoa Praiminisitra Ntsay CHRISTIAN, Lehiben’ny Governemanta sy ireo Minisitra isan-tokony.
Ho an’ny sehatry ny Angovo :
Nankatoavin’ny Filan-kevitry ny Minisitra ny fampitana am-bava momba ireo tetikasa »parcs solaires ».
Tetikasa Parcs Solaires 50 MW : Araka ny toromarika efa nomen’ny Filohan’ny Repoblika dia ho tsinjaraina 5MW avy ireo renivohi-paritany ary ny 20 MW dia apetraka ho an’ny tambazotra Iraisan’Antananarivo izay ho tsinjaraina amina toerana telo no hametrahana ireo tobim-pamokarana: eny Ambatomirahavavy (3MW), Ampangabe (10 MW), sy Ambohidrano Ilafy ( 7 MW).
Efa tonga eto Antananarivo avokoa ireo singa hananganana ireo tobim-pamokarana ireo ary vinavinaina ho vita amin’ny volana Avrily 2025 ny fananganana izany. Tetikasa Parc Solaire 50 MW eny amin’ny Lac Iarivo / PK-O Lalam-be migodana :Efa vita avokoa ny fanadihadiana ara-teknika momba ny fametrahana ity tobim-pamokarana herinaratra ity ary miroso ny famolavolana ny tolotra hananganana izany.
Vinavinaina ho vita amin’ny telovolana fahatelo ny taona 2025 izany tobim-pamokarana izany, sy ny fampidirana azy amin’ny tambazotra iraisan’Antananarivo. Ho fanamafisana ny tambazotra iraisan’Antananarivo ihany dia misy tobim-pamokarana herinaratra mandeha amin’ny herin’ny masoandro 50 MW fanampiny hatsangana izay ho tsinjaraina ao Ampitatafika Ihazolava (20 MW), Imerintsiatosika (20MW) ary Ibity (10 MW). 150 MW kosa no ho tsinjaraina manerana ireo Faritra rehetra ary efa vita avokoa ny fanadihadiana amin’ny fitsinjarana izany.
Ho fanamafisana ny famokarana herinaratra dia apetraka eo Ambohimanambola ihany koa ny famokarana herinaratra HFO manan tanjaka 105 MW izay ho tantanan’ny JIRAMA. Tanjona napetraka ny hampandehanana ity tobim-pamokarana ity amin’ny volana Jona 2025. Nankatoavin’ny Filan-kevitry ny Minisitra natao omaly ihany koa ny fampitana am-bava ny momba ny vidin’ny solika fandrehitra.
Nanomboka ny volana Jolay 2021 dia notazomina 2.130 ariary ny vidin’ny solika fandrehitra izay ambany manoloana ny tena vidiny na » vérité des prix ». Izany dia ho fitsinjovana ny vahoaka izay mampiasa izany.
Ny Fanjakana Malagasy araka izany no mandoa ny »subventions » izay mahatratra hatramin’ny 95 miliara ariary amin’ireo orinasa mpamokatra solika. Tsy maintsy hirosoana araka izany ny fampiakarana miandalana ny vidin’ny solika fandrehitra hampihenana ny »subventions » aloan’ny Fitondram-panjakana.