Rivodoza « Gamane »
Miverina ny famatsiana solika ao SAVA
Tontosa teto Sambava ny fivoriana nandaminana ny famerenana amin’ny laoniny, ny famatsiana solika ao amin’ny Faritra SAVA taorian’ny fandalovan’ny rivodoza « Gamane » . Voafaritra ny tetiandro sy rindran-damina izay niarahan’ny Ministeran’ny Angovo sy Akoranafo (MEH), ny Ofisy Malagasy misahana ny Akoranafo na OMH, ny avy amin’ny Birao Nasionaly misahana ny Ambana sy ny Loza Ara-boajanahary na BNGRC, ny Vondron’ny mpandraharaha amin’ny solika na GPM, ny LPSA ary ireo manam-pahefana isan-tsokajiny eto an-toerana.
Tapaka nandritra izany ny fandefasana sambo mpitatitra solika any SAVA, ho fanampiana ny fitaterana solika avy ao amin’ny tobin-tsolika ao Vohemar mankany Antalaha.
Ny Praminisitra Lehiben’ny Governemanta , Atoa NTSAY Christian no nitarika ny fivoriana, ary nanatrika izany ny Minisitry ny Angovo sy Akoranafo Atoa JEAN-BAPTISTE Olivier, ny 13 Avrily 2024.
Nitohy ny 14 Avrily 2024 ny fidinana notarihin’ny Praiminisitra Lehiben’ny Governemanta , hamahana ny olana mianjady amin’ny vahoaka manoloana ny takaitra navelan’ny rivodoza « Gamane ».
Tonga omaly 14 Avrily 2024 koa ny sambo izay nitondra solika ( Gasoil : 145m3 sy lasantsy : 37m3) ho an’ny Distrikan’Ambanja . Heverina fa hahampy tsara ny tahirin-tsolika any an-toerana izao fahatongavana izao. Araka ny fampitam-baovao avy amin’ny Tale iraisam-paritry ny Angovo (DIEH) Diana, Atoa FITSARANA Hyacint Hubert dia efa misy ny lamina napetraka mba hamerenana amin’ny laoniny ny famatsiana solika ao amin’ny Faritra.