Miroso ny asa amin’ny 50 MW

Hita maso sy azo tsapain-tanana ny ezaka firosoana amin’ny asa. Porofon’izany, ny fahatongavan’ireo takela-masoandro (panneaux photovoltaïques) eto amin’ny seranan-tsambon’i Toamasina ankehitriny. Miisa 25 ireo « containers » no voaray, 145 ireo efa eny ambony sambo mizotra ho aty Madagasikara. Mitotaly 345 izy ireo no ho avy misesy, mitondra ireo fitaovana hananganana ireo fotodrafitrasa.

Tonga nitsidika ireo, androany 8 Marsa 2024, ny delegasiona notarihin’ny Ministry ny Angovo sy ny Ankoranafo (MEH) Andriamatoa JEAN-BAPTISTE Olivier, notronin’ireo mpiara-miasa eto anivon’ny Ministera, sy ireo tompon’andraikitra isan-tsokajiny avy amin’ny JIRAMA, ny SPAT ary ny MICTLS.

Dingana manaraka ny fanatobiana ireo fitaovana tonga, mialoha ny fandefasana any amin’ireo toerana hisitraka azy ireo voalohany.

Tsiahivina fa ny Tetikasa 50 MW, dia miompana amin’ny fananganana tobim-pamokarana herinaratra avy amin’ny masoandro (Parc solaire) manerana Distrika miisa 47. Tanjona amin’izao ny fampiroboroboana ny sehatry ny angovo azo avaozina, sy ny hampiakarana ny tahan’ny vahoaka misitraka herinaratra amin’ireo Distrika ireo. Eo koa ny hanenana ny fandaniana amin’ny fividianana gazoala, no sady hikajiana ny tontolo iainana. Marihana fa famatsiam-bola avy amin’ny Fanjakana Malagasy no hanatontosana ny Tetikasa.