Angovo azo havaozina
Lany ny volavolan-dalàna momba ny sata mifehy ny IRENA
Dingana goavana ho an’ny fampandrosoana ny sehatry ny angovo azo havaozina eto Madagasikara no vita. Tontosa ny 13 Novambra 2024 teny amin’ny Lapan’ny Antenimierandoholona 
Anosikely, ny fandaniana ny volavolan-dalàna PL N° 013-2024 tamin’ny 13 Jona 2024, mankatoa ny sata mifehy ny IRENA na « Agence Internationale pour les Energies Renouvelables ».
Tsiahivina fa ny IRENA dia fikambanana niorina tao Bonn (Allemagne) ny taona 2009. Tarigetra ny fampiroboroboana ny fiaraha-miasa iraisam-pirenena amin’ny angovo azo havaozina. Firenena 168 no efa mpikambana, ary 13 no miandry hiditra, ka anisany i Madagasikara.
Tanjona ny hanohanana ireo firenena miroso amin’ny famokarana angovo madio, anisan’izany i Madagasikara. Tsy mpamatsy vola ny IRENA, fa manampy kosa amin’ny fitadiavana famatsiam-bola ireo tetikasa. Anisan’ny tarigetran’ny fikambanana ny manohana ireo tetikasan’ireo Firenena mpikambana amin’ny fikarohana sy fanentanana ny famatsiam-bola mifanaraka amin’izany.
Nolanian’ireo Loholona tonga nanatrika ny fotoam-pivoriana avy hatrany ny volavolan-dalàna mikasika ny sata mifehy ny IRENA ity. Vinan’ny Fitondram-panjakana ny fampandrosoana haingana ny sehatry ny angovo azo havaozina eto Madagasikara, amin’ny alalan’ny fidirantsika ho mpikambana amin’ny IRENA izao.
Nitarika ny Delegasiona nanolotra ny volavolan-dalàna ny Minisitry ny Angovo sy ny Akoranafo, Atoa JEAN-BAPTISTE Olivier.