Fiovaovan’ny toetrandro
Hampihena 13% ny entona maloto ny sehatry ny angovo azo havaozina
➡️ Anisan’ny singa iray miantoka ny fandrosoan’ny Firenena ny fahaizana miady amin’ny fiovaovan’ny toetrandro. Notontosaina ny 14 Oktobra 2024 teto amin’ny Novotel ny dinika an-databatra boribory momba ny famatsiam-bola ho an’ny fiovaovan’ny toetrandro eto Madagasikara. 📝Nikaon-doha niaraka ny Governementa Malagasy, sy ny Tahirim-bola Iraisam-pirenena (Fond Monétaire International – FMI), ny Banky Iraisam-pirenena (Banque Mondiale – BM) ary ny sehatra tsy miankina.
▶️ Nivoitra nandritra ny adihevitra ny antony mahatonga ny tsy fahampian’ny rano ankehitriny, izay miantoka ny 25% amin’ny famokarana angovo eto Madagasikara ka mahatonga ny tsy fahatomombanana amin’ny famatsiana herinaratra. 🤝 Hamafisina araka izany ny fiaraha-miasa eo amin’ny Fitondram-panjakana sy ny sehatra tsy miankina ary ireo mpamatsy vola, ho fanampiana ny Firenena amin’ny lafiny tontolo iainana, ny angovo ary izay voakasiky ny fiovaovan’ny toetrandro.
❇️ Nisolo tena ny Fanjakana Malagasy ny Minisitry ny Toekarena sy Fitantanam-bola, Rtoa RABARINIRINARISON Rindra Hasimbelo, Ny Minisitry ny Angovo sy ny Akoranafo ; Atoa JEAN-BATISTE Olivier, ny Minisitry ny Tontolo IUainana sy Fampandrosoana Lovainjafy, Atoa FONTAINE Max Andonirina, ary ny Minisitry ny Rano, ny Fanadiovana sy ny Fidiovana, Atoa ANDRIANAMELASOA Lalaina.
📍 Tanjona lehibe no ho tratrarina hatramin’ny 2030 dia ny hampitomboana ho 70% ny tahan’ny Malagasy misitraka herinaratra, ka hampiakarana ho 80% ny tahan’ny fampiasana ny angovo azo havaozina, mba hampihenana hatramin’ny 13% ny famoahana entona maloto ho fiarovana ny tontolo iainana sy ny fahasalaman’ny vahoaka.

Laisser un commentaire

Votre adresse e-mail ne sera pas publiée. Les champs obligatoires sont indiqués avec *