Fanarenana ny JIRAMA

Ireo fanapahan-kevitra lehibe taorian’ny fihaonana teo amin’ Andriamatoa Filohan’ny Repoblika, #AndryRajoelina sy ireo solontenan’ny Sendikan’ny mpiasan’ny #JIRAMA :

Nekena ny hampidirana solontena iray avy amin’ny mpiasa ao amin’ny filan-kevim-pitantanana (Conseil d’Administration). Mila manolotra anarana 3 ny JIRAMA, ka ny Filoha sy ny Governementa no hisafidy izay mahafeno ny fepetra

Ho dinihina miaraka amin’ireo mpahay lalàna eo anivon’ny Fiadidiana ny Repoblika ny fanendrena ny mpikambana ao amin’ny filan-kevim-pitantanana sy ny Tale Jeneraly amin’ny alàlan’ny « Décret »

Komity fanarenana : nekena ny hampidirina solontenan’ny mpiasa ao amin’io komity fanarenana ny JIRAMA io, ka mila olona manana ny fahaiza-manao sy traikefa amin’ny lafiny fitantanana ara-bola, ara- teknika amin’ny angovo sy rano, sns

Ny Ordonnance 75-024 dia tsy manankery intsony araka ny Lalàna 2014-014 (Andininy faha-19 sy faha-21), fa ny mpiasa dia mbola afaka manolotra fanitsiana amin’izay andininy mila amboarina amin’ny Sata Vaovao. Hisy komity hiombonana avy amin’ny Fiadidiana ny Repoblika, ny Minisiteran’ny Angovo sy Akoranafo (#MEH), ny Ministeran’ny Toekarena sy Fitantanam-bola (#MEF), solontenan’ny mpiasa handinika sy hanolotra ny fanovana

Ny solontenan’ny mpiasa dia nangataka ny hijerena ihany koa ny andininy sasantsasany ao amin’ny Lalàna 2017-020 (Code de l’Electricité). Ho dinihan’ny komity ihany koa izay fanitsiana ilaina miaraka amin’ny Fiadidiana ny Repoblika, Ministeran’ny Angovo sy Akoranafo, ny ORE, sns, ka hanome soso-kevitra ny Governemanta

Nohamafisin’ Andriamatoa Filohan’ny Repoblika fa tsy misy eritreritra na fikasana hanao « privatisation » ny JIRAMA, izay mijanona tanteraka ho orinasam-panjakana

Mitohy hatrany ny fifampidinihana sy fifanankalozan-kevitra mba hanarenana sy hanatsarana ny JIRAMA