Fampisitrahana herinaratra :Fanombohan’ny tetikasa « 400 activités »
Tontosa androany 28 Aogositra 2023 teny Ambohidrabiby, ny fanombohana ny fandaharan’asa « 400 activités » hiarahan’ny JIRAMA amin’ny Tetikasa LEAD. Nitarika izany ny Minisitry ny Angovo sy Akoran’Afo, Atoa Solo ANDRIAMANAMPISOA. Tanjona ny hampisitraka herinaratra ireo toerana mbola tsy misy izany, amin’ny alalan’ny fanitarana ny tambazotra mpitsinjara herinaratra. Eo ihany koa ny fanamafisana ireo fotodrafitrasa ary ny fanatsarana ny kalitaon’ny angovo tsinjaraina amin’ireo faritra manerana ny Nosy.
Mitentina 275 Miliara Ariary ny famatsiam-bola avy amin’ny Banky Iraisam-pirenena hanatontosana ny asa. Andrin-jiro (poteau en béton) mitotaly 34.000 no ho vitaina. Tariby mirefy 1.600 km mitondra herinaratra maivana (BT) sy herinaratra mahery vaika (MT) no ho apetaka. Manampy ireo ny vata mpanova herinaratra (transformateur) miisa 650. Tanjona ny hampiakatra 10% ny tahan’ny vahoaka misitraka herinaratra, izany hoe olona eo amin’ny 2 tapitrisa. Eo ihany koa ny famoronana asa. Marihina fa ny tetikasa LEAD sy ny « Projet National de Redressement (PNR) dia tafiditra ao anaty PDDR-CERC.
Ireo tetikasa ireo dia vinaina ho vita amin’ny volana Desambra 2023 sy amin’ny volana May 2024. Anisan’ny toerana hisitraka ny tetikasa : Arivonimamo, Faratsiho, Moramanga, Analavory, Ambositra, Manandriana, Fianarantsoa, Ranomafana, Mitsinjo, Bealanana, Vavatenina, Antsohihy, Toamasina, Ambovombe, Tsihombe, Vohipeno, Manakara, Midongy Atsimo, Bekily, Soavinandriana, Ampefy, Mahitsy, Anjozorobe, Ambodiatafana, Antsiranana…Izao dia tafiditra indrindra ao anaty fanatanterahana ny Velirano faha-2 an’Atoa Filohan’ny Repoblikan’i Madagasikara : « angovo ho an’ny daholobe ».
