Angovo madio
Fako avadika ho angovo
Mazava ny tanjona, dia ny fanomezana sehatra ny famadihana ny fako ho lasa angovo. Nisy ny atrikasa « MatchMaking Event National » izay notanterahina teny amin’ny PANORAMA Andrainarivo, ny 15 Novambra 2024.
Fotoana ampivondronana ireo mpisehatra sy matihanina, amin’ny alalan’ny fifanakalozan-kevitra sy fifampizaràna traikefa. Tarigetra ny hametrahana drafitra matipaika sy fampivelarana ny fifandraisana eo amin’ny mpisehatra sy ireo mpiara-miombon’antoka.
Anisan’ny nandray anjara tamin’ny fifanakalozana ireo solontenan’ny sehatra tsy miankina, ny avy amin’ny Oniversite, ireo mpikaroka, ary ireo mpamatsy vola isan-karazany .
Tafiditra tanteraka amin’ity tetikasa ity ihany koa ny fomba fahandroana sakafo amin’ny angovo madio ( Cuisson Propre/ Clean Cooking), izay anisan’ny anjara famelabelarana nentin’ny solontenan’ny Ministeran’ny Angovo sy ny Akoranafo (MEH) nandritra ny atrikasa .
Voaresaka fa 80 % an’ny tokantrano Malagasy ankehitriny no mbola mampiasa arina fandrehitra mahazatra na kitay (charbon de bois et bois de chauffe) izay sady misy fiantraikany ratsy amin’ny fahasalamana no manimba ny tontolo iainana .
Anisan’ireo tonga nanatrika ny atrikasa ny solontena avy amin’ny Ministeran’ny Angovo sy ny Akoranafo (MEH), ny avy amin’ny Ministeran’ny Tontolo Iainana sy ny Fampandrosoana Lovainjafy ( MEDD), ny solontenan’ny TWENex ary ny AIDES.