Asa maika hatao ao anatin’ny 100 andro ho an’ny sehatry ny angovo

Laharam-pahamehana ny ady amin’ny fahatapatapahan’ny herinaratra

Hatomboka ny fananganana ireo tobim-pamokarana herinaratra azo avy amin’ny masoandro (parcs solaires) ho an’ireo Distrika miisa 47, ary ho tohizana hatramin’ny volana Jona 2024 izany

Hirosoana ny fanamboarana ny foibe famokarana angovo azo avy amin’ny rano (centrale hydroélectrique) Sahofika sy Volobe

Himasoana ny fanomezana fitaovam-pahazavana azo avy amin’ny masoandro (kits solaires) ho an’ny tokantrano miisa 4 tapitrisa tokony hotratrarina ao anatin’ny herintaona, sy ny fametrahana jiro (lampadaires) mandeha amin’ny herin’ny masoandro hanazava ny tanàna sy amin’ny fidirana ny tanàn-dehibe rehetra manerana ny Nosy

Tohizana ny famokarana sy fivarotana herinaratra ataon’ny tsy miankina, amina Kaominina efa voafaritra mialoha, araka ny fomba fiasa vaovao apetraka miaraka amin’ny Banky Iraisam-pirenena

Atao ny fametrahana sy fampandehanana ny toby famokarana angovo (centrale thermique) ao Ambohimanambola, ahafahana mahazo herinaratra manana tanjaka 105 MW eto Antananarivo. Efa an-dalana ny fanatanterahana ny tetikasa ankehitriny ka kendrena ho vita ao anatin’ny fotoana faran’izay haingana

Nanome toromarika manokana Andriamatoa Filohan’ny Repoblikan’i Madagasikara, ny hampidirana ao anatin’ny asa maika tsy maintsy hatao, ny fanatsaharana fangatahana tanim-panjakana, noho ny fitomboan’ny kolikoly mitarika halatra tanin’olona ao anatin’izany, ka handinika ny hanamafisana ny didy aman-dalàna ilaina ny tompon’andraikitra isan-tsokajiny, tarihin’ny Ministeran’ny Fitsarana.

Nankatoavin’ny Filan-kevitry ny Minisitra izay notanterahina ny Alarobia 24 Janoary 2024 teny amin’ny Lapam-panjakana Iavoloha ihany koa fa :

Raisin’ny Fanjakana Malagasy an-tanana ny fandoavana ny hetra sy ny haban-tseranana amin’ny fanafarana entana avy any ivelany, mikasika ny fampidirana ireo fitaovana ilaina amin’ny fananganana ny foibe famokarana angovo amin’ny herin’ny masoandro manana tanjaka 50 MW hampiasain’ny orinasa JIRAMA , ao anatin’ny tetikasa « Projets parcs solaires ».