Angovo ho an’ny daholobe.
Teny Mandroseza ny MEH androany
Herinandro vaovao manomboka tamin’ny fidinana ifotony teny Mandroseza. Nitsidika tobim-pamokarana herinaratra mandeha amin’ny solika mavesatra, ny Minisitry ny Angovo sy Akoranafo (MEH) Atoa Olivier JEAN-BAPTISTE, androany 12 Febroary 2024. Nanotrona azy ireo tompon’andraikitra isan-tsokajiny eto amin’ny MEH sy ao amin’ny JIRAMA ary ireo mpiara-miombon’antoka amin’ny sehatra tsy miankina.
Mamokatra 27 MW ireo milina miisa 3 miodina eto, izay hiaraha-miasa amin’ny « AfriPower ». Himasoana ny hanampiana milina mpihary herinaratra iray amin’ity taona ity. Ankoatra ny dinika sy fifanakalozan-kevitra, dia notsiahivin’ny MEH, Atoa Olivier JEAN-BAPTISTE fa laharam-pahamehana ny fampivadiana (hybridation) an’ireo tobim-pamokarana herinaratra mbola mampiasa solika, hirosoantsika amin’ny fampiasana angovo azo avaozina. Tanjona hoy izy ny hananana angovo maharitra sy madio ary amin’ny vidiny mirary.
Izao dia tafiditra indrindra ao anaty fanatontosana ireo asa maika sy ny vinan’ny Fitondram-panjakana, fa indrindra ny Velirano faha-2 an’Atoa Filohan’ny Repoblikan’i Madagasikara : angovo ho an’ny daholobe.