Angovo azo havaozina
Haravoana ny eto Toliara II
An-taonany maro no nanantenan’ny vahoaka eto amin’ny Distrikan’i Toliara II ny hazavana. Ankehitriny, dia ravo izy ireo nahazo tobim-pamokarana herinaratra mandeha amin’ny masoandro na « centrale solaire » (CS) 
ny eto amin’ny Kaominina Ambanivohitra Ambahikily, tahaka izany koa, ny eto amin’ny Kaominina Ambanivohitra Ankililoaka. 
Manana tanjaka 579KWc ny voalohany, ary 463 KWc kosa ity faharoa.
Tontosa soa aman-tsara ny 30 Aogositra teo, teto Ambahikily, ny andrana voalohany (essai) amin’ny milina mpihary herinaratra na « groupe électrogène » (GE) izay manana tanjaka 330 KVA, hatao fiandry (GE de secours). 
Ny Zoma 6 Septambra izao no kasaina hatao ny andrana teknika ho an’ny milina mpihary herinaratra hatao fiandry, eto amin’ny CS Ankililoaka.
Efa tonga eto Ambahikily sy Ankililoaka koa izao ireo vatoaratra (batterie de stockage), hitahiry ny herinaratra vokarin’ireo CS eto. Hatao avy hatrany ny andrana teknika (essai technique) amin’ireo CS, vantany vao tafapetraka ireo vatoaratra. Afaka fotoana fohy sisa, dia hisitraka ny vokatra azo avy amin’ireto fotodrafitrasa vaovao, ny vahoaka amin’ireto Kaominina Ambanivohitra ireto.
Nitarika ny Delegasiona nanatrika ny andrana, ireo Ben’ny Tanàna, sy ny Tale Iraisam-paritry ny Angovo sy ny Akoranafo (DIEH) Toliara, Atoa MILLY Martial, ary ireo tompon’andraikitra eo anivon’ny ANKA Madagascar. Izao dia porofon’ny firoboroboana eo amin’ny fiaraha-miasan’ny Fanjakana sy ny sehatra tsy miankina na « Partenariat Public-Privé » (3P). 
Fitaratra ihany koa, amin’ny firosoantsika eo amin’ny fampiasana ny angovo azo havaozina, sy ny fampidirana herinaratra amin’ny tontolo ambanivohitra. 
Tanjona ny hampitombo avo 2 heny ny tahan’ny vahoaka misitraka herinaratra eto Madagasikara hatramin’ny 2030.
Sary: DIEH Toliara