Angovo azo havaozina eto Melaky sy Menabe
Mandroso ny asa fampidirana herinaratra
Laharam-pahamehana ny fampidirana herinaratra amin’ny tontolo ambanivohitra. Tontosa teto Morondava, ny atrikasa fifanakalozana ho an’ny Komitin’ny Jiro eto amin’ireo toerana ambanivohitra anaty Faritra Melaky ary Menabe. Fokontany ambanivohitra miisa 6 no namaly ny antso sy tonga nanatrika ny atrikasa.
Ny 4 efa amin’ireo dia efa misitraka jiro amin’ny alalan’ny « kits solaires » :* 2 eto Menabe, izay eo ambany fiahian’ny WWF : Kivalo sy Ambakivao,
* 1 eto Melaky izay eo ambany fiahian’ny WWF : Beanjavilo,
* 1 eto Menabe eo ambany fiahian’ny MNP : Ambararata,
An-dalam-pikarakarana kosa ny fahazoana ireo fitaovana ho an’ireo 2 hafa eto Menabe, izay eo ambany fiahian’ny WWF, dia ny Fokontany Bosy sy Marohatà.
Nandritra ny atrikasa izay notanterahina ny 28 sy 29 Oktobra 2024, dia nisy ny fijerena vahaolana sy fananganana drafitra (Plan d’action), ary fifanakalozana traikefa teo amin’ireo mpikambana, hoenti-manatsara hatrany ny ho avy.
Ny 30 sy 31 Oktobra ary ny 1 Novambra 2024, dia nitohy ny fidinana ifotony teto amin’ny Fokontanin’i Kivalo. Nisy ny fanentanana ny vahoaka amin’ny fikajiana ireo fitaovana, handoa ara-dalàna ny vidin-jiro, ary hampiasa ireo fitaovana araka ny tokony ho izy.
Ankoatra ireo, dia nisy ny fifampizaràna sy fanamafisana traikefa teo amin’ireo » Femmes Ingénieures solaires » (FIS) izay natao teto Kivalo ihany. Nisy ihany koa ny fanadihadiana notanterahina teny anivon’ny tokantrano tsirairay.
Niaraka nanatanteraka ny fidinana ifotony ny Tale Iraisam-paritry ny Angovo sy ny Akoranafo (DIEH) Mahajanga, Rtoa VAVIZARA Sylvie, sy ny DIEH Toliara, Atoa MILLY Martial, ny avy amin’ny MNP , ary ny avy amin’ny Prefektioran’ny Morondava. Hetsika izay tafiditra indrindra ao anaty « Programme National Barefoot College » (PNBC).