Angovo azo havaozina
Natolotra ny foibem-pamokarana herinaratra avy amin’ny masoandro eto Ambatondrazaka
Miroso hatrany i Madagasikara amin’ny fampiasana angovo azo havaozina. Tontosa androany 27 Mey 2024, teto amin’ny Fokontany Antanambehivavy Ambohimandroso, Distrika Ambatondrazaka, Faritra Alaotra Mangoro, ny fanolorana amin’ny fomba ofisialy ny foibem-pamokarana herinaratra avy amin’ny masoandro, izay manohana ny tobim-pamokarana herinaratra mandeha amin’ny solika (Centrale Hybride Photovoltaïque).
Manana tanjaka 1.053 KWc ity tobim-pamokarana herinaratra avy amin’ny masoandro ity. Miisa 3.240 ireo takela-masoandro, amin’ny velaran-tany 5 Ha misy ny fotodrafitrasa. Mahatratra 1.681 MWh isan-taona ny tanjaka herinaratra vokariny. Izany dia hahafahana mitsitsy solika 7 hetsy litatra isan-taona, izany hoe manodidina ny 3 Miliara ariary. Izao no tontosa dia vokatry ny fiaraha-miasan’ny Fanjakana Malagasy sy ny orinasa tsy miankina LOCAPRO.
Marihina fa laharam-pahamehana ho an’ny Fitondram-panjakana ny fampitomboana ny famokarana herinaratra, sy ny tahan’ny vahoaka misitraka izany manerana ny Nosy.
Amin’ny alalan’ny fampiroboroboana ny 3 P, na ny fiaraha-miasan’ny Fanjakana amin’ny sehatra tsy miankina, sy ny fanohanana avy amin’ireo mpiara-miombon’antoka, no hahafahana manatratra ny tanjona. Andry iankinan’ny fampandrosoana ny Firenena ny sehatry ny Angovo.
Nanatontosa ny fanolorana androany, ny Filohan’ny Repoblikan’i Madagasikara, Atoa Andry RAJOELINA, notronin’ny Minisitry ny Angovo sy ny Akoranafo, Atoa JEAN-BAPTISTE Olivier, ary ireo tompon’andraiki-panjakana isan-tsokajiny.