Angovo azo avaozina:Notokanan’Atoa Filoham-pirenena ny CS ao Ankorikihely
Hita maso sy azo tsapain-tanana tokoa ny fanatanterahana ny Velirano faha-2 nataon’ny Filoham-pirenena, Atoa Andry RAJOELINA: “angovo ho an’ny daholobe”.
Notokanan’Atoa Filoha androany Sabotsy 12 Aogositra 2023, ny fotodrafitrasa vaovao, dia ny tobim-pamokarana herinaratra avy amin’ny masoandro na “centrale solaire” (CS) eto Ankorikihely, ato anaty Kaominina Ambanivohitra Ramena, Distrikan’Antsiranana faha II.
Mandroso ny ezaka amin’ny fampiasana angovo azo avaozina eto Madagasikara. Zava-dehibe ho an’ny fikajiana ny tontolo iainana maneran-tany, sy ny fiahiana ny fahasalaman’ny mponina.
Ity CS ity dia manana tanjaka 2,4 MWc. Mahatratra 4.735) MWh isan-taona ny herinaratra vokarina eto. Miisa 24 ireo “onduleurs”. Tokantrano miisa 3.600 no misitraka herinaratra voalohany amin’izany, raha miisa 19.000 ny mpanjifa eto anivon’ny Kaominina Ambonivohitra Antsiranana.
Mirefy 140.225 m² ity toerana misy ny tobim-pamokarana herinaratra avy amin’ny masoandro ity. Fa ny isan’ny goavana indrindra amin’ny fananana azy, dia entona ratsy na “CO2” milanja 1.889 taonina isan-taona no voailika tsy hisy anaty natiora. Zava-dehibe loatra izany ho an’ny tontolo iainana. Tsara ny manamarika fa ny herinaratra vokarina eto dia mamatsy ny tambazotran’ny JIRAMA.
3P
Izao fotodrafitrasa vaovao izao no mitsangana, dia vokatry ny fiaraha-miasa mahomby sy matotra tamin’ny orinasa DIEGO GREEN POWER sy ireo mpiara-miombon’antoka ENAT ary DERA ENERGY. Izao dia taratry ny fampiroboroboana ny fiaraha-miasa eo amin’ny Fanjakana sy ny sehatra tsy miankina (3P). Izany dia entintsika miaraka mampandroso ny Firenena sy ho an’ny tombontsoan’ny vahoaka Malagasy ary ny taranaka fara aman-dimby. Taorian’ny fitokanana dia nambaran’ny Minisitry ny Angovo sy Akoran’Afo (MEH), Atoa Solo ANDRIAMANAMPISOA, fa:
“tanjon’ny Fitondram-panjakana ny hampiakatra avo roa heny ny tahan’ny vahoaka misitraka herinaratra eto Madagasikara. Porofo ny fananganana tobim-pamokarana herinaratra avy amin’ny masoandro manerana ny Nosy. Mitotaly 78 izy ireo. Ttsy hisy Faritra, na Distrika, na Kaominina ho adino amin’ny fampisitrahana herinaratra. Laharam-pahamehana amin’izany ny tontolo ambanivohitra”. Eo ihany koa hoy Atoa MEH fananganana ireo tobim-pamokarana herinaratra avy amin’ny tohodrano lehibe. Ny sehatry ny angovo tokoa mantsy, dia anisan’ny kitro ifaharan’ny fampandrosoana ny Firenena.