Angovo azo havaozina
Tetikasa fanomezan-danja sy famadihana ny fako eto Antananarivo
Notanterahina androany 18 Jolay 2024 ny fanombohana amin’ny fomba ofisialy ny Tetikasa fanomezan-danja ny fako mitoby eto Andralanitra (Valorisation et recyclage des déchets solides municipaux de la Commune Urbaine d’Antananarivo).
Fako 400.000 taonina isan-taona no mitoby eto, izay misy fiantraikany ratsy amin’ny fahasalamana sy ny tontolo iainana satria ny « Méthane » vokatry ny fako dia manimba ny natiora. Hitombo hatrany nefa izany manoloana ny fitombon’ny isan’ny mponina sy ny filàna eto Antananarivo.
Fiaraha-miasan’ny vondron’orinasa Apis Solutions, ny Kaominina Andrenivohitra Antananarivo (CUA), ny « Société Municipale d’Assainnissement » (SMA), ny Ministeran’ny Angovo sy ny Akoranafo (MEH), ny Ministeran’ny Tontolo Iainana sy ny Fampandrosoana Lovainjafy (MEDD), ny Ministeran’ny Atitany sy ny Fitsinjaram-pahefana (MID) ary ireo avy amin’ny sehatra tsy miankina, no enti-manatanteraka ny Tetikasa .
Ho an’ny sehatry ny angovo manokana dia ho tombony avy amin’izao Tetikasa fanodinana ny fako eto an-toerana izao, ny hamokarana « Biométhane », izay azo ampiasaina ho angovo ho an’ny orinasa na koa amin’ny fahandroana sakafo avy amin’ny angovo madio (cuisson propre).Ity Tetikasa ity koa dia hamokatra zezika « compost » (Engrais biologique) azo ampiasaina amin’ny fambolena, ka mahasolo ny “engrais chimique” mahazatra.
Nanambara ny Minisitry ny Angovo sy ny Akoranafo Atoa JEAN-BAPTISTE Olivier fa izao no tanteraka dia vokatry ny fiaraha-miasan’ny Fanjakana Malagasy sy ny sehatra tsy miankina (3P), ary tanjona azo eritreretina koa ny fomba hamadihana ireo fako ho herinaratra.
Marihina fa afaka herinandro vitsy dia hanomboka ny asa fananganana ny toby voalohany fanodinana ny fako eto, ary ny volana Jolay 2025 no hanomboka hiodina ka hamokatra ilay “Biométhane”.