Angovo sy Akoranafo
Fampanaraham-penitra amin’ireo fitaovana
Nanatanteraka iraka teto Madagasikara nandritra ny roa andro ny Talem-paritry ny « International Electrotechnical Commission » (#IEC) eto Afrika, Atoa François AHOTI .
Ho famaranana ny fitsidihany, dia nisy ny atrikasa niarahana tamin’ireo mpisehatra mampiasa fitaovana « électrotechniques »: anisan’izany ny angovo, ny akoranafo, ny fifandraisan-davitra, ny indostria sy ny varotra, ny sehatra fikarohana sy ny Oniversite, ary ireo mpandraharaha. Atrikasa notanterahina androany 18 Marsa 2025 , teto amin’ny « Amphithéâtre » Ampandrianomby.
Niompana tamin’ny fampahafantarana ny mikasika ny fenitra IEC, ary ny vondrona #NEC (Comité Electrotechnique National), izay solontenan’ny IEC eto Madagasikara .
Tarigetra ny fanentanana ireo mpisehatra hiditra ao amin’ny NEC, hahafahana mandray fenitra miisa 400 maimaimpoana, ary mampahafantatra sy mampihatra izany eto Madagasikara, ho fiarovana ny mpanjifa sy ny mpampiasa fitaovana « électrotechnique » eto Madagasikara .
Tombony ho an’ny fampiharana ireo fenitra IEC ny hahazoana fitaovana tsara kalitao, maharitra sy tomombana ara-teknika, manaraka ny fenitra iraisam-pirenena, fa indrindra manampy ny asa famoronana.
Marihina fa miisa 170 ny Firenena mikambana ao amin’ny IEC, ary ahitana fenitra miisa 14.526 izay mizara ho an’ny sehatra maro, anisany ny Angovo sy Akoranafo .
Nitarika ny atrikasa ny Talem-paritry ny IEC eto Afrika, Atoa François AHOTI sy ny Tale misahana ny Fampiroboroboana Tetikasa amin’ny Angovo eto anivon’ny #MEH, Rtoa RAZAFIMAHATRATRA Dina Anjaraniaina.