Africa50
Vita sonia ny ampahany voalohany amin’ny famatsiam-bola ny Tetikasa Volobe
Andro lehibe manan-tantara eo amin’ny sehatry ny angovo azo havaozina sy manamarika ny firoboroboan’ny fiaraha-miasa eo amin’ny Fanjakana sy ireo mpiara-miombon’antoka ary ny tsy miankina (3P) ny fanatontosana ny fanaovan-tsonia voalohany amin’ny famatsiam-bola ho fanatanterahana ny Tetikasa Volobe. Nandritra ny lanonam-panokafana ny Fivoriambe (AG) an’ireo mpampiasa vola eo anivon’ny « Africa50 » teny amin’ny CCI Ivato ny 19 Septambra 2024, no nanaovana izany.
Mifandray amin’ny lohahevitry ny Fivoriambe, izay miompana amin’ny « fampiroboroboana ny angovo azo havaozina sy fitadiavana famatsiam-bola ho fananganana fotodrafitrasa eto Afrika », ny fahazoana ny tohana ho fananganana ny tobim-pamokarana herinaratra avy amin’ny rian-drano hanana tanjaka 120MW, amin’ny alalan’ny Volobe. Miisa 2 tapitrisa ny mponina hisitraka angovo avy amin’ny Tetikasa.
Ny « Development Finance Corporation » (DFC) ary ny Vondrona Eoropeanina, avy amin’ny fiaraha-miasa amin’ny « Africa50 », no naneho ny fanohanany ka nanao sonia ny fifanarahana famatsiam-bola ampahany voalohany, niarahana tamin’ny Fanjakana Malagasy, ary ny CGHV izay misahana ny Tetikasa. Mbola hiampy io famatsiam-bola io.
Nanambara ny Filohan’ny Repoblikan’i Madagasikara, Andriamatoa Andry RAJOELINA, fa ny sehatry angovo dia anisan’ny fanoitra ho fampandrosoana an’i Madagasikara, ka noho izany, ny fampiasam-bola amin’io sehatra io dia antoka hitondra mankany amin’ny angovo maitso sy maharitra. Mila hafainganina hoy izy ny fanombohan’ny Tetikasa Volobe sy ireo hafa maika. Tsiahivina moa fa ny Fitondram-panjakana dia manana tanjona ny hampitombo avo roa heny raha kely indrindra ny tahan’ny vahoaka misitraka herinaratra hatramin’ny 2030.
Taorian’ny fanokafana tamin’ny fomba ofisialy ny Fivoriambe, dia nisy ny valandresaka narahina adihevitra isan-karazany, anisan’ny nandray anjara ny Minisitry ny Angovo sy ny Akoranafo Atoa JEAN -BAPTISTE Olivier. Lohahevitra ny « firosoana amin’ny fampiasana angovo azo havaozina (transition énergétique), ireo tetikasa goavana toy ny fananganana tobim-pamokarana herinaratra avy amin’ny rian-drano sy ny avy amin’ny rivotra, ny fampidirana herinaratra amin’ny tontolo ambanivohitra ary ny fanavaozana ireo lalàna mifehy ny sehatry ny angovo eto Madagasikara ».
Marihina fa ny Africa50 dia sehatra ho an’ny fampiasam-bola izay eo ambany fitarihan’ny Banky Afrikanina ho an’ny Fampandrosoana (BAD) ho fananganana fotodrafitrasa aty Afrika. I Madagasikara dia tafiditra ao anatin’izany, ho fampandrosoana ara-ekonomika. Firenena 32 no voasolo tena nanatrika ny Fivoriambe teny Ivato.