Nitondra ny paikady teto Tsimbazaza ny MEH

Tsimbazaza, Alatsinainy 17 Novambra 2025 : Tonga namaly ny fampiantsoana nataon’ny Antenimierampirenena, ireo Minisitra miisa 6. Anisany ny Minisitry ny Angovo sy ny Akoranafo (#MEH), Andriamatoa RALITERA Ny Ando Jurice. Naharitra adim-pamataranandro iraika ambin’ny folo (11) ny fandraisana ireo fanontaniana na fanamarihana sy fangatahana momba ny famatsiana herinaratra sy rano, avy amin’ireo Solombavambahoakan’i Madagasikara.

Fotoana ihany koa, tokony nitondran’ Andriamatoa MEH ny paikady momba ny famahana ny olana, sy ny drafitra hoenti-mamaly ny hetahetan’ny vahoaka Malagasy, anaty fohy ezaka, antonony ezaka ary lavitra ezaka. Ohatra ny fanohizana ny hetsika fandatsahana orana (Opération Pluies Provoquées) na OPP, vao afaka manao izany any Andekaleka sy ny manodidina hampiakarana ny haavon’ny rano. Tanjona ny hampiakatra ny famokarana herinaratra any an-toerana.

Eo koa ny fanafarana milina mpamokatra herinaratra (Groupe électrogène) na GE, hanampiana tosika ny eto amin’ny Tambazotra Iraisan’Antananarivo (RIA), hisorohana ny delestazy. Halefa any amin’ny Faritra ireo, hanoloana ireo milina efa antitra, vao miverina amin’ny laoniny ny famokarana herinaratra eto amin’ny RIA. Miara-dia amin’izany, ny famahana ny olan’ny any amin’ny Faritra, sy ny fandraisana ireo fangatahana isan-karazany : ohatra ny fanoloana ireo fitaovana efa antitra loatra na simba, ny fananganana tobim-pamokarana herinaratra mandeha amin’ny herin’ny masoandro. Eo ireo Tetikasa lehibe toa an’i Sahofika, Volobe, Antetezambato ary Ranomafana. Voaresaka ihany koa ny fangatahana fanaovana fitsirihana (audit) ara-pitantanana sy ara-bola eo anivon’ny JIRAMA. Ny fampidirana herinaratra amin’ny tontolo ambanivohitra, sy ny angovo azo havaozina.

Tamin’ny 1 ora maraina mahery, no tapitra ny fandraisam-pitenenan’ireo mpampiantrano. Tapak’ireo Solombavambahoaka noho izany, fa hatao an-tsoratra ny famaliana ireo valiny rehetra. Ho an’ny sehatry ny angovo, dia nahatratra 71 ireo Solombavambahoaka nametraka fanontaniana, nanao fanamarihana sy naneho fangatahana, ka ho valiana tsirairay an-taratasy.