Kaominina Ambanivohitra Mandialaza

Mponina miisa 7.500 no misitraka mivantana, na ankolaka ny herinaratra vokarina. Himasoana ny fampiroboroboana ny sehatry ny angovo azo havaozina eto amintsika, laharam-pahamehana ny fampidirana herinaratra amin’ny tontolo ambanivohitra. Tontosa androany 4 Desambra 2025 teto Andriambe, Kaominina Ambanivohitra Mandialaza, Distrika Moramanga, Faritra Alaotra Mangoro, ny fitokanana ny tobim-pamokarana avy amin’ny rano.

Manana tanjaka 200 kW ny tobim-pamokarana avy amin’ny rano eto Andriambe. Miasa 24 ora isan’andro. Amin’izao taona voalohany izao, dia hahafahana manome herinaratra ho an’ny toeram-ponenana 498, orinasa 42, ary biraom-panjakana 9. Mirary ny sandan’ny herinaratra ho an’ny mpanjifa, satria manomboka amin’ny 650 Ar ny 1 KWh.

Raha atotaly, dia mihoatra ny 7.500 ny isan’ny olona hahazo tombontsoa mivantana sy ankolaka amin’ity fotodrafitrasa vaovao ity amin’ireo tanàna manodidina dia Antseva sy Fiherenana.

Hisy fiantraikany mivantana amin’ny fiainan’ny mponina ity tobim-pamokarana herinaratra ity. Mahazo jiro ny tokantrano, afaka mianatra ny mpianatra amin’ny alina, ary afaka miasa amin’ny fomba azo antoka sy milamina kokoa ny tobim-pahasalamana sy ny biraom-panjakana. Afaka hampivelatra ny asany ny mpanao asa-tanana sy ireo seha-pihariana hafa rehetra, ny orinasa madinika sy salantsalany. Raha fintinina, dia hanampy amin’ny fanovana ara-toe-karena eto an-toerana ary hanokatra fahafahana vaovao ho an’ny rehetra ity fotodrafitrasa ity.

Porofo amin’ny fahombiazan’ny fiaraha-miasa eo amin’ny Fanjakana sy ny sehatra tsy miankina (3P) amin’ny alalan’ny ADER, ny ONUDI, ny CEAS Madagascar, ary ny orinasa SIER-GC. Nitarika ny lanonana androany, ny Minisitry ny Angovo sy ny Akoranafo, Andriamatoa RALITERA Ny Ando Jurice, sy ny Filoha Lefitry ny Antenimierampirenena ho an’ny Faritanin’i Toamasina, Andriamatoa RAZARA Pierre Ravolaza Fidèle, notronin’ireo manampahefana sy tompon’andraikitra isan-tsokajiny