Fanombohan’ny Tetikasa IED

Tontosa androany Zoma 26 Avrily 2024 teto amin’ny NOVOTEL Alarobia ny fanombohan’ny fandaharan’asa ho an’ireo mpisehatra hahazo fanohanana amin’ny angovo maharitra na « Incubateur d’Energie Durable »(IED), izay atolotry ny Tetikasa « Financement Intégré pour les Energies Durables » (FIER). Ny tahirim-bola ho an’ny ODD no mamatsy vola. Miara-misalahy amin’ny fanatanterahana kosa ny PNUD, ny UNCDF, ny ONUDI. Nanokatra izao fanombohana ofisialy androany izao, ny Sekretera Jeneralin’ny Ministeran’ny Angovo sy ny Akoranafo, Atoa ANDRIANTSOA Thierry.

Tanjona ny fanomezana tan-tsoroka ho an’ireo orinasa madinika na salasalany, sy ireo « start up » maniry hisehatra amin’ny tontolon’ny angovo azo havaozina eto Madagasikara. Fanohanana amin’ny lafiny fiofanana sy ara-bola no hatolotra, ho an’ireo manangana tetikasa.

Mahatratra 80.000 ny olona hisitraka ny FIER izay Tetikasan’ny Fanjakana Malagasy, eo ambany fiahian’ny Ministeran’ny Angovo sy ny Akoranafo (MEH), ny Ministeran’ny Toekarena sy ny Fitantanam-bola (MEF) ary ny Ministeran’ny Tontolo Iainana sy ny Fandrosoana Lovainjafy (MEDD). Hifaranany taona 2026 moa ny Tetikasa FIER.