Fampidirana herinaratra ho an’ny tobim-pahasalamana (CSB II) Ihazoara

Tetikasa lehibe maneho ny finiavan’ny Fitondram-panjakana hanatsara hatrany ny sehatry ny fahasalamana sy ny angovo azo havaozina eto Madagasikara, no notokanana tamin’ny fomba ofisialy androany 13 Mey 2026, teto amin’ny Distrikan’i Vohibato, Faritra Matsiatra Ambony.

Vita ny fampidirana herinaratra avy amin’ny masoandro eto amin’ny tobim-pahasalamana (CSB II) Ihazoara, Fokontany Andraramila. Manana tanjaka 2,1 kWc ny herinaratra avy amin’ny masoandro mampiodina ny #CSBII eto.

Tanjona ny hanampiana ireo mpitsabo sy ny mpiasan’ny fahasalamana ao anaty fanatanterahana ny asany, ny fanomezana herinaratra ho an’ireo fitaovana samihafa mampiasa izany, ny fitahirizana ny vaksiny sy fanafody isan-karazany, ary indrindra ny fitsinjovana ny vahoaka manatona ny tobim-pahasalamana. Eo ihany koa ny fanitarana ny fampisitrahana herinaratra, indrindra amin’ny tontolo ambanivohitra.

Ny Tetikasa #LEAD, izay tohanan’ny Banky Iraisam-pirenena (#BanqueMondiale), no tompo-marika amin’ny fanatanterahana ny asa. Marihina fa miisa 501 izao ireo CSB manerana ny Nosy, no nahazo herinaratra avy amin’ny masoandro amin’ny alalan’izao ezaka izao. Mbola hiampy 90 ny isan’izy ireo ato anatin’ny 2 volana ho avy.

Nitarika ny lanonam-pitokanana ny Minisitry ny Angovo sy ny Akoranafo (#MEH), Atoa RABEARIMANGA Radonirina Lucas, notronin’ireo olomboafidy sy tompon’andraiki-panjakana isan-tsokajiny avy eto amin’ny Faritra Matsiatra Ambony.