Angovo madio

Notanterahina androany 29 Jaonary 2026 teto amin’ny « Amphithéâtre La Croix » Ampandrianomby, ny atrikasa niarahana tamin’ireo mpiara-miombon’antoka ara-teknika sy ara-bola (PTF) misehatra amin’ny fahandroana sakafo amin’ny angovo madio, sy ny fanamarihana ny andro iraisam-pirenena ho an’ny angovo madio .

Tanjon’ny atrikasa ny fanolorana ny vina sy ny drafitrasa 3 taona ( Programme Triennal ) 2026–2028 ho an’ny fahandroan-tsakafo amin’ny angovo madio. Izany dia mikendry ny hanova tsikelikely ny toetsaina sy fahazarana eo anivon’ny tokantrano malagasy ao an-dakozia, ho fampihenana ny fahapotehan’ny ala sy ny fiantraikany ara-tontolo iainana, ary ny loza ara-pahasalamana.

Miteny ho azy ny tarehimarika : 97% amin’ny tokantrano eto amintsika no mbola mampiasa arina fandrehitra na kitay. Vokany dia 200.000 Ha isan-taona ny ala potika. 18.000 isan-taona ny olona maty noho ny entona karbônika entin’ny arina fandrehitra na kitay. Loza mitatao ny faharinganan’ny 25% amin’ny ala eto Madagasikara amin’ny taona 2030.

Vahaolana : ahitana sehatra 6 lehibe ny fomba fahandroan-tsakafo amin’ny angovo madio, tarihin’ny « Madagascar Clean Cooking Initiative » (MCCI), izay misy mpikambana 53 mahenika Faritra 13, dia ny : angovo azo avy amin’ny akora biolôjika (Bioénergie), ireo karazana « Combustibles modernes », ny fatana mitsitsy (Foyers améliorés) , ny entona fandrehitra (Gaz na koa antsoina hoe GPL) , ny « E-Cooking » , ary ireo mampiasa ny teknolôjia mandeha amin’ny herin’ny masoandro (Solaire) .

Araka ny nambaran’ny Minisitry ny Angovo sy ny Akoranafo, Atoa RALITERA Ny Ando Jurice dia manamafy ny fahavononany hatrany ny Fanjakana malagasy hiara-hientana amin’ireo mpiara-miombon’antoka sy ireo mpisehatra, ho fampiroboroboana ny fomba fahandroana sakafo amin’ny angovo madio eto Madagasikara.

Tsotra ny tanjona hoy hatrany ny tenany : fiovana sy fifindrana amin’ny angovo madio, ho fitsinjovana ny tontolo iainana sy ny ala, ny fiahiana ny fahasalamana ary fanatsarana ny faripiainan’ny vahoaka malagasy.