Akoranafo

Ampandrianomby, 20 Mey 2026 : Notanterahina androany ny fampahafantarana tamin’ny fomba ofisialy ny “ Lettre de politique de l’aval pétrolier », izay nankatoavin’ny Filankevitry ny Minisitra omaly Talata 19 mey 2026.

Nitondra fanazavana tamin’izany ny Tale Jeneralin’ny Akoranafo, Atoa ANDRIANARAHINJAKA Harivelo, sy ny Tale Jeneralin’ny OMH, Atoa RAVELOSON Cydolain, izay namelabelatra ireo andry lehibe sy tanjona ary fanavaozana voarakitra ao anatin’io « lettre de politique» io.

Mifototra amin’ny taridalana stratejika efatra lehibe ny politika, dia ny :

Fanamafisana ny fiandrianam-pirenena eo amin’ny sehatry ny angovo, mba hiantohana ny famatsiana maharitra sy azo antoka ho an’ny vahoaka

Fanokafana bebe kokoa ny tsena eo amin’ny sehatry ny « aval pétrolier », mba hanatsarana ny tolotra omena ny mpanjifa

Fanamafisana ny mangarahara sy ny fitantanana mahomby sy maoderina

Firosoana miandalana mankany amin’ny angovo azo havaozina, ao anatin’ny fanatanterahana ny “transition énergétique”, ho fiarovana ny tontolo iainana sy ho fampandrosoana maharitra.

Marihina fa mifototra amin’ny Politikam-panjakana ankapobeny momba ny Fanavaozana (PGE-R) ity « lettre de politique de l’aval pétrolier » ity, ary miantoka ny fanamafisana ny famatsiana solika eto Madagasikara.

Noho izany dia hanolotra volavolan-dalàna mifandraika amin’io politikam-panjakana momba ny akoranafo io ny Minisiteran’ny Angovo sy ny Akoranafo atsy ho atsy.